.png "د مــــوع وحــــنــــيــــن")
وراح العمر بين رحله .وبين رحلة
وبين سكة سفر ضحلة
وأيام سوُد ما تتعدش
وليل فيه السما كحلة
سنين راحت مابين غربة
وبين كـربه وبـيـن وحـلـة
وبين أنات ماليها حدود
وجوع كافر وعيش سحلة
وأقول بكره هاتتعدل
وباستـني يكون أحلي
وجه بكره ولون بكره
بلون ماباينلهوش نِحلة
واتاريني مع الدراويش
بالف وأدور كما النحلة
وبادعي ربنا فْ قلبي
وأقول يارب تسترها ما تفضحهاش
وسْترة ربنا أحلي
وأهي عيشه واخرتها بيجي الموت
وتمضي للحياة رحلة
وتبدأ رحلة الأخرة وفيها حساب
حضور وغياب
نعيم وعذاب
وتبدأ للحياة رحلة
وجنة ربنا أحلى
